Я.Сод-Эрдэнэ Хөгжлийн банкны дэд захирлаар ажиллаж байхдаа дүүгийнхээ компанид 11,5 тэрбумын зээл олгожээ

Ерөнхийлөгчийн Тамгын газрын дарга Я.Содбаатар 2016-2020 онд УИХ-ын гишүүнээр ажиллаж байхдаа Хөгжлийн банкнаас зээл авсан тухай мэдээлэл өнөөдөр цацагдлаа. Тодруулбал түүнтэй хамаарал бүхий “МБҮ трейд” ХХК 2018 оны 02 дугаар сарын 13-ны өдөр 11,5 тэрбум төгрөгийн зээлийг Хөгжлийн банкнаас авсан байна. 

“МБҮ трейд” ХХК-ийн хувьцааг Я.Содбаатарын хөрөнгө орлогын мэдүүлэгт тусгагдсан “Хотол түмэн” ХХК эзэмшдэг тухай мэдээлэл Улсын бүртгэлд бүртгэгджээ. Энэ утгаараа Хөгжлийн банкнаас 11,5 тэрбум төгрөгийн зээл авсан “МБҮ трейд” ХХК-ийн ард Я.Содбаатар байна хэмээн хардаж болох үндэслэлтэй юм.

“МБҮ трейд” ХХК-ийн тухайд Хөгжлийн банкны чанаргүй зээлдэгчийн жагсаалтад орсон байдаг бөгөөд өнөөдрийн байдлаар тус компани Хөгжлийн банкинд 16,8 тэрбум төгрөгийн өртэй байна.

Я.Содбаатарын ах Я.Сод-Эрдэнэ нь 2016 оноос  хойш Хөгжлийн банкинд дэд захирлын албан тушаал хашиж байгаад 2022 оны нэгдүгээр сарын сүүлээр  ажлаа өгчээ.

Өөр нэг ноцтой зүйл байгаа нь Я.Сод-Эрдэнэ нь Хөгжлийн банкны Хяналт шалгалт хариуцсан дэд захирлын албан тушаал хашиж байх үедээ буюу 2018 онд өөрийн төрсөн ах Я.Содбаатарын хамаарал бүхий “МБҮ трейд” ХХК-д зээл олгох асуудалд оролцсон гэдэг мэдээлэл юм. 

Мөн тэрээр  “МБҮ трейд” ХХК-иас гадна  Хөгжлийн банкны чанаргүй зээлдэгчдийн нэг “Бармон” ХХК-д 13,8 тэрбум төгрөгийн зээл олгох асуудалд хутгалдсан байж болзошгүй ажээ. “Бармон” ХХК-ийн ард Я.Содбаатарын нэр холбогддог "Химон консракшн" ХХК байдаг гэх мэдээлэл байгаа юм.

ЭХ СУРВАЛЖ: YELLOW.MN