Киргиз улс Монголын татварын албаны үйлчилгээгээ цахимжуулсан туршлагыг судалж байна

Татварын ерөнхий газрын дарга Б.Заяабал Бүгд Найрамдах Киргиз Улсын Эдийн засаг, худалдааны дэд сайд И.Э.Асылкулов болон Татварын албаны дарга А.К. Абдувапов нарыг хүлээн авч, уулзлаа.

Уулзалтын үеэр Дэд сайд И.Э.Асылкулов Засгийн газрынхаа тэргүүний даалгавраар Монгол Улсын татварын албаны цахимжилт, хиймэл оюун ухааныг үйлчилгээндээ нэвтрүүлэх гэж байгаатай холбоотой сайн туршлагууд, НӨАТ-ын хуулийн хэрэгжилтийг сайжруулах “Ebarimt” системийн талаар туршлага судлах хүсэлтээ илэрхийлж, хоёр тал цаашдын хамтын ажиллагааг өргөжүүлэх талаар санал солилцов.

Энэ өдрүүдэд Бүгд Найрамдах Киргиз Улсын Гадаад хэргийн сайд Ж.Кулубаев Монгол Улсад албан ёсны айлчлал хийж байна. Эдийн засаг, худалдааны дэд сайд дэд сайд И.Э.Асылкулов, Татварын албаны дарга А.К. Абдувапов нар Татварын ерөнхий газарт тавдугаар сарын 29-31-ний хооронд ажиллана.