Д.Дагвадоржийн компани циркийн арын нийтийн эдэлбэр газар дээр худалдааны цогцолбор төв барих газрын зөвшөөрөл гаргуулан авчээ

Циркийн арын нийтийн эдэлбэр газар Асашёрюү Д.Дагвадоржийн эхнэр М.Отгонцэцэгийн “Рояалплаза” ХХК-ийн мэдэлд очжээ. Тодруулбал, Нийслэлийн засаг дарга Су.Батболдын 2017 оны тавдугаар сарын 29-ний өдрийн А/358 захирамжаар тус газрыг цэцэрлэгт хүрээлэнгийн зориулалтаар  “Рояалплаза” ХХК-д анх олгож байжээ. Улмаар Нийслэлийн засаг даргын 2017 оны аравдугаар сарын 05-ны өдрийн А/741 тоот захирамжаар “Рояалплаза” ХХК-д эзэмшүүлсэн дээрх газрын зориулалтыг өөрчилж газар доорх худалдаа үйлчилгээ, авто машины зогсоол болгон 15 жилээр эзэмшүүлжээ.

Үүнээс гурван жилийн дараа буюу 2020 оны есдүгээр сарын 09-ний өдөр тухайн газрын эзэмших эрхийг худалдаа, нийтийн үйлчилгээний газар, төв, цогцолбор гэсэн огт өөр зориулалттай болгож 1460200733 нэгж талбарын дугаартай, эзэмших эрхтэй кадастр гаргаж өгсөн байна.

Энэ үед Нийслэлийн засаг даргын үүрэг гүйцэтгэгчээр одоогийн НИТХ-ын дарга Ж.Батбаясгалан ажиллаж байсан юм. Ж.Батбаясгаланг Нийслэлийн засаг даргын үүрэг гүйцэтгэгчээр ажиллаж байх үед Д.Сумъяабазар нь Нийслэлийн МАН-ын хорооны даргаар сонгогдон орон нутгийн сонгуульд намаа удирдан оролцох нь нэгэнт тодорхой болчихсон байв. Нэг үгээр Ж.Батбаясгаланг дахин нэр дэвшүүлэх эсэх асуудал Д.Сумъяабазарын эрх хэмжээнд очсон байсан гэсэн үг. Гэтэл яг ийм эгзэгтэй цаг үед Ж.Батбаясгалан Д.Дагвадоржийн эхнэрийн компанид нийтийн эзэмшил газар дээр худалдаа үйлчилгээний цогцолбор барих кадастрын зөвшөөрөл олгосон нь анхаарал татаж байгаа юм.

Мөн Су.Батболд, Д.Сумъяабазар нарын тухайд нэг намын харьяалалтай, Су.Батболдын ахлах зөвлөхөөр ажиллаж байсан Д.Мөнх-Эрдэнийг сүүлд Д.Сумъяабазар дэргэдээ татан өөрийн ахлах зөвлөхөө болгосон байдаг ажээ.

Товчхондоо бол Су.Батболд, Ж.Батбаясгалан нарын олгосон зөвшөөрлийн дагуу Д.Дагвадоржийн компани тус нийтийн эдэлбэр газар дээр өнөө, маргааш гэлгүй худалдаа, үйлчилгээний цогцолбор төв барих ажлаа эхлүүлэхэд гайхах зүйлгүй болжээ.